ЁШЛАР – ЯНГИ ЎЗБЕКИСТОН БУНЁДКОРЛАРИ
Бугун мамлакатимизда Ёшлар куни кенг танатана қилинди. Давлатимиз раҳбарининг тегишли фармони билан бир гуруҳ йигит-қизларимиз «Келажак бунёдкори» медали ва “ Мард ўғлон ” давлат мукофотлари билан тақдирландилар. Жойларда мазкур сана муносабати билан қатор тадбирлар ташкил этилди.
Ана шундай тадбирлардан бири Фарғона вилояти экология, атроф-муҳитни муҳофаза қилиш ва иқлим ўзгариши бошқармаси ташаббуси билан ўтказилди. Бошқарманинг мажлислар залида “Ёшлар – Янги Ўзбекистон бунёдкорлари” шиори остида маънавий-маърифий тадбир ташкил этилди.
Ушбу анжумандан кўзланган мақсад ёшларнинг экологик онги ва маданиятини ошириш, уларни мамлакат тараққиётида фаол иштирок этувчи авлод сифатида тарбиялаш, ёш экофаолларни рағбатлантириш ва уларнинг ташаббусларини қўллаб-қувватлашдан иборат эди.
Тадбирда вилоятнинг шаҳар ва туманларидан ташриф буюрган 35 нафар экофаол ёшлар иштирок этди. Ўзаро мулоқот чоғида уларда атроф-муҳитни муҳофаза қилиш, ресурслардан тежамкорлик билан фойдаланиш ва жамоатчилик онгини шакллантириш бўйича қизиқиш ва ташаббуслар юқори эканлиги намоён бўлди.
Маънавий-маърифий тадбирда Фарғона вилояти экология, атроф-муҳитни муҳофаза қилиш ва иқлим ўзгариши бошқармасининг бир қатор мутахассислари қатнашиб, бугунги ёшларнинг табиат муҳофазаси йўлидаги ташаббускорлиги ҳақида тўхталиб, улар ўз тенгдошлари орасида экологик маданият тарғиботини янада кенгайтириб бораётганликлари, атроф-муҳит дахлсизлигини сақлашда жамоатчилик назоратида фаол иштирок этаётганликларини таъкидладилар. Улар ўз чиқишларида ёшларнинг мамлакат экологик хавфсизлигини таъминлашдаги ўрни, келгусидаги вазифалар ва имкониятлар ҳақида ҳам атрофлича сўз юритдилар.
Тадбир якунида энг фаол ёшларга самимий миннатдорчилик билдирилди ҳамда уларнинг табиат муҳофазаси йўлидаги саъй-ҳаракатларини янада кучайтириш, қўллаб-қувватлаш юзасидан амалий таклифлар билдирилди.
Шаҳодат Жўрабоева,
Фарғона вилояти экология, атроф-
муҳитни муҳофаза қилиш ва иқлим
ўзгариши бошқармаси бошлиғининг
маслаҳатчиси.
